1Jo 5 | ASO | STEP | Ve malite Izesu'nimu' nene aza do lu' izelive lo O'moso'mo imiselelesa live neive li gili ele'vole' ilizani' nene O'mosolati' soto' igi izipahala zuho lili' igi nizave. Ido' ve ma ingine lu'ine me'nibine imi ma izipahala zuhosi ngimilisave.

1 John 5

O'mosomu' Gilive Nene Misubou' Monovo Mehene nGemaa' Neive Lo Gizine' Gamazi

1 Ve malite Izesu'nimu' nene aza do lu' izelive lo O'moso'mo imiselelesa live neive li gili ele'vole' ilizani' nene O'mosolati' soto' igi izipahala zuho lili' igi nizave. Ido' ve ma ingine lu'ine me'nibine imi ma izipahala zuhosi ngimilisave. 2 Ido' lute O'moso'mi izipahala zuho ngemaa' noube ngemamaa' noube. Lute O'moso emo lo huko line' gamazi gele do mino ma nene mo lamineto' lute ngemaa' noune lo ningo gelelesune. 3 Lute O'moso emali'mi monovo ti' ogo neive: Lo huko line' gamazi gele dalone' nene mo lamineto' lute emaa' olosune. Ido' O'moso'mo lo huko line' gamazi nene geni'vesi nominako ngelo livizamoloseive. 4 O'mosolati' soto' unive laza nene O'moso gelekele' i-damani' misubou' aleveti monovo nene damo a'mine monovo nene amuzo molo do leme'mo ogo minunako O'moso'mo lo huko line' gamazi nene livizesa'mive. Ido' a'mine misubou' minine' monovo nene gele damo amuzo molo'mo ogo minaa' noune' nene naniteli'mo ve. Izesu'nimu' gele ele'vole' ogo none' ne'mo ve. 5 Ido' zamote a'mine misubouko minine' monovo di limi'mi igi amuzo mili minilizave. Ingine Izesu'nimu' aza lamine' O'moso'mi gipele neive li gili ele'vole' i nizavetevo' ne'mine ilisave.

O'moso Aza Gipele'mi Gamazi Hize Ele' O-dine' Gamazi

6 A'mine ve Izesu' Kilisito' aza nene nososi vanisesi soto' ine' ve. Nosovo' nomive. Soto' ine' nene mono' noso holanikisi vanise lepo hilinekisi ne neive. Ido' Sikalahu' ne'mo aza a'mine gamazi nene hize ele' o-daa' neive. Sikalahu' aza gamazi gihile'mi meleho neinako a'mine gamazi laa' neivo gihile izaa' neive. 7 Nemu' nene Sikalahu' ne'mo ido' mono' noso holani' ne'mo ido' vanise lepo hiline' ne'mo Izesu' monovo hize ele' i-di gono daa' nave. Sikalahu' ido' noso holani' ido' vanise've ingine setohamo nete gamazi lani' nene hamo' gamazi neive. 9 Haza evene' nete gamazi ma hizi ele' ikevo ma nene laza a'mine gamazi mo lamineto' neive lo gelaa' noune. Ne neiha O'moso'mo gamazi liline' nene haza eveneliti gamazi ivile' ogo gihile lamine' izeleseive. Nemu' nene O'moso'mo gipele hize ele' o-do line' gamazi neine' nene gele ele'vole' olosune. 10 Ingine O'moso'mi gipelemu' gili ele'vole' iga' nave nene lu'inedunu' gilikevo ele'vole' oga' neive. Ido' ingine O'moso'mo line' gamazi gili ele'vole' ami nizave nete O'moso'mo gipele hize ele' o-do line' gamazi nene gilikevo gihile izesa'minako nemu' O'mosomu' sozalo' ve ve lani' gelaa' neive. 11 Ido' gipele hize ele' o-do line' gamazi nene ti' lo neive: O'moso'mo minevo' minevo' oga' lemeni dameni nene mo leme neive. Ido' a'mine minevo' minevo' minaali'mi meleho nene ei' gipele ne neive. 12 Nemu' nene ingine O'moso'mi gipele di gili' li nizani' nete nene minevo' minevo' oga' ngemeni dameni nesi di nizave. Ido' ingine O'moso'mi gipele di gili' li di minamave nete minevo' minevo' oga' ngemeni dameni nesi mo damave.

Minevo' Minevo' Lemeni Damenisi Minaakumu' Gizine' Gamazi

13 O'moso'mi gipelemu' gili ele'vole' i nizave lingine minevo' minevo' lengemeni dameni nene mo do none li gili ele'vole' igi gililizave lo mene gamazi nene nogize-lingimuve. 14 Laza ti' lo O'moso'mi velelo' gele olobo' o none: O'mosola inite' mamu' voku' lunivo ei' gele neido' vo daline' nene gele lemeleseive. 15 Ido' ne'mine mana'mine initekumu' voku' lunivo gele lemeleseive lo gele ele'vole' o none' nenako inite' mamu' voku' lo-delone' nene lemavo lite' lo daa' noune lo gele none.

16 Ve mali'mo eze zuho ma goloso nite' nodavo ningivo a'mine ne'mo mudise helaa' akau' vilido' nomivo ma nene a'mine vemu' O'mosola lilive. Lavo O'moso'mo minevo' minevo' emeni damenisi mine do dizo mineline' akalo' ele'mize molaloseive. Mudise hilaa' akau' vilizado' nomine' goloso nite' davemukovo' noluve. Goloso nite' ma neine' nene a'mine dalizani' nene mudise hilaa' akau' vilizado' o neive. Ne'mine inite' davemu' O'mosola lilizave lo lamuve. 17 Goloso nite' muki' nene lihime daa' nitekovo' neive. Neine'za goloso nite' ma dalone' nene vo mudise helaa' akau' volonido' nomive. 18 Laza ti' lo gelaa' noune: O'mosolati' soto' unidite nene goloso nite' do minamolosune. O'moso'mi gipele ne'mo gizebo o-ledavo goloso'mi meleho aza gelelehe' o-ledo do goloso o-ledamoloseive. 19 Laza nene O'mosolati' soto' ogo none lo gele none. Ido' me misubou' ve O'moso gelekele' i-damani' muki' nete goloso melehida vi gi'mizi gelekele' i-di nizani' nesi gele none. 20 Ido' ti' lo gele none: O'moso'mi gipele aza misubouko lemo ogave. Ogo gate do ngolo' lo-lidine' nenako O'moso gihile nene ningo gelaa' noune'. Ee, O'moso gihile nesi bizo none. Gipele Izesu' Kilisitokisi bizo none. Me ve nene O'moso gihile ido' minevo' minevo' ogo minaali'mi meleho neive. 21 Izipaha'ne zuho mate, lingine avazaha o'moso nite' O'moso gihile minamani' nene gelekele' i-ngidikelizaze. Monovotido' gizebo lamine' igi minilo.

Moda ve.